Snæfellsbær

Snæfellsbær opnar ferðavef til kynningar á sveitarfélaginu

Snæfellsbær - 50 mín 26 sek síðan

Snæfellsbær opnar í dag nýjan ferðavef þar sem við kynnum Snæfellsbæ sem ákjósanlegan áfangastað til ferðalaga í sumar til stuðnings ferðaþjónustu í sveitarfélaginu.

Helsta markmið með nýju vefsíðuna er að efla stafræna viðveru sveitarfélagsins og bæta aðgengi að upplýsingum um ferðaþjónustutengdar greinar og afþreyingar- og útivistarmöguleika í sveitarfélaginu.

Samhliða vefnum ætlar Snæfellsbær að efla kynningarstarf og auka sýnileika sveitarfélagsins á samfélagsmiðlum og í fjölmiðlum. Sú vinna er þegar farin af stað og verður kynnt fljótlega.

Við opnum vefinn í dag en ábendingar um hvað vanti á hann og megi betur fara á honum eru vel þegnar. Hvetjum við íbúa til jafns á við ferðaþjónustuaðila til að senda tölvupóst á heimir@snb.is ef það er með ábendingar eða spurningar. Saman gerum við hann betri.

Við búum við einstaka náttúrufegurð hér í Snæfellsbæ, höfum aðgang að frábærum veitinga- og gististöðum og hér er boðið upp á þjónustu- og afþreyingu sem ætti að henta öllum aldurshópum og fjölskyldum.

Leggjum öll okkar á vogarskálarnar, verum dugleg að deila myndum og jákvæðum fréttum frá svæðinu og hvetjum fólk til að heimsækja okkur í sumar.

Smelltu hér til að opna nýja ferðavefinn. 

The post Snæfellsbær opnar ferðavef til kynningar á sveitarfélaginu appeared first on Snæfellsbær.

Flokkar: Snæfellsbær

Nýtt Fréttaskot

Grunnskóli Snæfellsbæjar - 2 klukkutímar 56 mín síðan
Komið er út nýtt Fréttaskot og það síðasta á þessu skólaári. Í því eru upplýsingar um skólaslit, útskrift tíundu bekkinga, sumalestur, upplýsingar um opnunartími Bókasafns Snæfellsbæjar sumarið 2020 og fréttir úr skólastarfinu.Hægt er að nálgast Fréttaskotið á þessum tengli - https://sites.google.com/gsnbskoli.is/03042020/fr%C3%A9ttaskot-9
Flokkar: Snæfellsbær

Tímabundin lækkun á hámarkshraða við Rif vegna kríuvarps

Snæfellsbær - Miðv.d., 27/05/2020 - 14:27

Nýtt skilti við Rif sem varar við varplandi fugla í nágrenninu. Sett upp í morgun, 27. maí 2020.

Hámarkshraði á þjóðveginum/Útnesvegi við Rif verður lækkaður tímabundið í sumar vegna kríuvarps og er unnið að því að setja upp skilti þess efnis nærri Rifi þessa dagana.

Kríuungar sækja í þurrt og heitt malbikið á veginum og borið hefur á því undanfarin ár að keyrt hafi verið á óheyrilegt magn af þeim á veginum milli Rifs og Hellissands. Snæfellsbær hefur unnið að lausn á málinu með Vegagerðinni sem hefur umsjón með veginum. Samkvæmt tillögu Vegagerðarinnar verður hámarkshraði lækkaður úr 90 km/klst. í 70 km/klst. á vissum vegkafla á tímabilinu 15. júní til 15. ágúst ár hvert. Útmörk svæðis sem lækkun á hámarkshraða tekur til má sjá á meðfylgjandi mynd hér að neðan.

Kríuvarpið er breytilegt frá ári til árs og jafnvel frá mánuði til mánuðar þannig að merkingar koma líklega til með að færast eitthvað til á hverju tímabili en útmörk svæðisins haldast óbreytt. Starfsmenn Vegagerðarinnar meta aðstæður hverju sinni.

Lækkun hámarkshraða á vegkaflanum er liður í áætlun vegna verndun fuglalífs á Rifi og með bættum merkingum og tímabundnum takmörkunum á hraða er vonast til að hægt sé að bjarga lífi hundruða kríuunga.

The post Tímabundin lækkun á hámarkshraða við Rif vegna kríuvarps appeared first on Snæfellsbær.

Flokkar: Snæfellsbær

Hafnarsjóður Snæfellsbæjar fær styrk til rafvæðingar hafna

Snæfellsbær - fös, 22/05/2020 - 15:42

Umhverfis- og auðlindaráðherra hefur úthlutað 6,2 milljón króna styrk til rafvæðingar hafna í Snæfellsbæ. Styrkurinn nýtist við lagningu rafmagns í Norðurgarðsbryggju í Ólafsvík. Framkvæmdin hefst eigi síðar en 1. september næstkomandi og verður lokið á fyrrahluta næsta árs. Eru hafnir Snæfellsbæjar í hópi 10 hafna sem fengu úthlutað styrk til verkefnisins.

Styrkurinn er hluti af fjárfestingaátaki ríkisstjórnarinnar vegna Covid-19 vegna heimsfaraldursins og er veittur til þeirra hafna sem settu fram verkefni sem féllu að skilyrðum átaksins um orkuskipti í höfnum.

Miklar framkvæmdir við hafnir Snæfellsbæjar

Hafnarsjóður Snæfellsbæjar hefur á undanförnum mánuðum ráðist í og undirbúið miklar framkvæmdir við hafnirnar í Ólafsvík, Rifi og Arnarstapa.

Í Ólafsvík stendur nú yfir framkvæmd við lengingu Norðurgarðs um 80 metra. Áætluð verklok eru í september 2020.

Dýpkunarframvæmdir eru fyrirhugaðar í Ólafsvík og Rifi á þessu ári. Búið er að dýptarmæla báðar hafnirnar og er verið  að vinna úr þeim þessa dagana auk þess sem unnið er að útboðsgögnum. Stefnt að því að framkvæmdir hefjist í sumar og verði lokið fyrir n.k. áramót.

Þá má jafnframt geta þess að síðasta vetur var höfnin á Arnarstapa dýpkuð og er dýpi innan hafnarinnar komið í þrjá metra. Þeim framkvæmdum er að fullu lokið.

Áætlaður heildarkostnaður vegna framkvæmdanna verður um kr. 390.000.000.

The post Hafnarsjóður Snæfellsbæjar fær styrk til rafvæðingar hafna appeared first on Snæfellsbær.

Flokkar: Snæfellsbær

Umgengni ábótavant í Tröð á Hellissandi

Snæfellsbær - Miðv.d., 20/05/2020 - 09:23

Umgengni í Tröð á Hellissandi hefur verið ábótavant undanfarið og vill Snæfellsbær árétta mikilvægi þess að íbúar gangi vel um opin svæði, þ.m.t. Tröðina.

Í Tröð er fyrirmyndar aðstaða til þess að slaka á og njóta samvistar með fjölskyldu og vinum og frábært að íbúar noti svæðið til dægrastyttingar, en þeir sem nota aðstöðuna eru minntir á að ganga frá eftir sig og taka rusl með sér. Tröðin er sameign okkar allra og mikilvægt að íbúar og aðrir gangi vel um og skilji við svæðið líkt og þeir vilja koma að því.

Skógræktar- og landverndarfélagið undir Jökli hefur umsjón með Tröðinni fyrir hönd Snæfellsbæjar og sér félagið til þess svæðið sé snyrtilegt og að þessi einstaka gróðurvin á Hellissandi vaxi og dafni. 

The post Umgengni ábótavant í Tröð á Hellissandi appeared first on Snæfellsbær.

Flokkar: Snæfellsbær

Frí föstudaginn 22. maí

Grunnskóli Snæfellsbæjar - Þri, 19/05/2020 - 18:16
Minnum á að á föstudaginn 22. maí er frí í skólanum - njótið samverunnar, mætum kát og hress til starfa á mánudaginn.
Flokkar: Snæfellsbær

Vinnusmiðja um ferðaafurðir og viðburði á Snæfellsnesi í sumar

Snæfellsbær - mánud., 18/05/2020 - 12:11

Vinnusmiðja um ferðaafurðir og viðburði – ferðasumarið 2020 á Snæfellsnesi

Þann 20. maí nk. halda Svæðisgarðurinn og Ferðamálasamtök Snæfellsness vinnusmiðju um ferðasumarið 2020 í fjölbrautaskóla Snæfellinga í Gundarfirði. Vinnusmiðjan stendur frá kl. 13:00 – 15:00.

Dagskrá:

13:00 – 13:15 Ragnhildur Sigurðardóttir kynnir verkefni Svæðisgarðsins

13:15 – 13:30 Elín Guðnadóttir kynnir sælkeraferðir um Snæfellsnes

13:30 – 15:00 Vinnusmiðja, samstarf um ferðaafurðir sumarið 2020 með áherslu á svæðisbundinn mat

Allir ferðaþjónustuaðilar á Snæfellsnesi eru velkomnir og hvattir til að mæta.

Sjá auglýsingu

The post Vinnusmiðja um ferðaafurðir og viðburði á Snæfellsnesi í sumar appeared first on Snæfellsbær.

Flokkar: Snæfellsbær

Tjaldsvæðið í Ólafsvík og upplýsingamiðstöð opna fyrir sumarið

Snæfellsbær - lau, 16/05/2020 - 11:14

Tjaldsvæðið í Ólafsvík opnaði í gær fyrir sumarið 2020. Við opnun hafa reglur stjórnvalda um tjaldsvæði verið hafðar til hliðsjónar og í fyrstu geta allt að 100 manns verið á tjaldsvæðinu hverju sinni. 

Tjaldsvæðin okkar hafa verið vinsæl síðustu ár og hefur Snæfellsbær leitast eftir því að bæta í sífellu þá aðstöðu og þjónustu sem má finna á tjaldsvæðunum.

Tjaldsvæðið á Hellissandi verður opnað fljótlega en nú standa yfir framkvæmdir á því sem tefja opnun. Verið er að setja nýtt og stærra þjónustuhús sem mun bæta aðstöðuna til muna, þ.m.t. fjölga salernum og sturtum, bæta eldunaraðstöðu og gera aðgengi fyrir fatlaða.

Stefnt er að því að hafa bæði tjaldsvæðin opin út septembermánuð hið minnsta. 

Á tjaldsvæðunum má finna eftirfarandi þjónustur:
  • Klósett (aðgengi fyrir fatlaða)
  • Sturta (aðgengi fyrir fatlaða í Ólafsvík)
  • Heitt og kalt vatn
  • Eldunaraðstaða
  • Vaskarými
  • Úrgangslosun
  • Rafmagn/rafmagnstenglar
  • Internet

Umsjón með tjaldsvæðum hafa Patrick Roloff og Rebekka Unnarsdóttir.

Hægt er að hafa samband við þau í síma 844 – 6929.

Hér má sjá gjaldskrá fyrir sumarið 2020.

Upplýsingamiðstöðin í Átthagastofu Snæfellsbæjar hefur einnig verið opnuð fyrir sumarið. Til að byrja með verður opið á virkum dögum frá kl. 8:00 – 16:00.

The post Tjaldsvæðið í Ólafsvík og upplýsingamiðstöð opna fyrir sumarið appeared first on Snæfellsbær.

Flokkar: Snæfellsbær

Opnun tilboða í framkvæmdir við búsetukjarna fyrir íbúa með fötlun

Snæfellsbær - fös, 15/05/2020 - 14:53

Í dag voru opnuð tilboð í framkvæmd við búsetukjarna fyrir íbúa með fötlun við Ólafsbraut í Ólafsvík. Það var Verkís hf. sem sá um útboð fyrir hönd Félags- og skólaþjónustu Snæfellinga.

Fimm tilboð bárust í verkið sem felst í fullnaðarfrágangi á búsetukjarnanum og eru áætluð verklok á heildarverki 30. ágúst 2021. Tilboð má sjá hér að neðan. Nú fer í gang mat á tilboðum áður en tekin verður ákvörðun um næstu skref. Kostnaðaráætlun verksins hljóðar upp á kr. 243.188.341.-

Heildartilboðsverð með vsk:

  • Spennt ehf – Frávikstilboð Tilboð hljóðar upp á kr. 207.833.288.-
  • Húsheild ehf Tilboð hljóðar upp á kr. 276.026.811.-
  • Spennt ehf Tilboð hljóðar upp á kr. 277.111.763.-
  • A Ísax ehf Tilboð hljóðar upp á kr. 277.518.623.-
  • Heinz byggingar Tilboð hljóðar upp á kr. 294.640.921.-

Um þjónustukjarnann

Í íbúðakjarnanum verða fimm einstaklingsíbúðir með sérinngangi ásamt starfsmannaaðstöðu. Íbúðirnar verða tveggja herbergja, á bilinu 54 til 56 fermetrar að stærð og standa saman af alrými með eldhúskróki og stofu, svefnherbergi, rúmgóðu baði, geymslu og þvottarými. Einn aðalinngangur er inn í bygginguna en þar undir þaki er nokkurs konar „innigata“. Frá henni er gengið inn í hverja íbúð fyrir sig. Útgengt er á veröld við hverja íbúð. Starfsmannarými er í húsinu og hugmyndin er sú að íbúar geti leitað til starfsfólks án þess að fara undir bert loft.

Staðsetning hússins var valin með það fyrir augun að stutt sé í alla helstu þjónustu, ekki síst Smiðjuna, sem er dagþjónusta og vinnustofa fyrir fólk með skerta starfsgetu. Það er teiknistofan AVH á Akureyri sem hannar húsið.

The post Opnun tilboða í framkvæmdir við búsetukjarna fyrir íbúa með fötlun appeared first on Snæfellsbær.

Flokkar: Snæfellsbær

Sundlaugin í Ólafsvík opnar á mánudag, 18. maí

Snæfellsbær - fös, 15/05/2020 - 12:05

Sundlaug Snæfellsbæjar í Ólafsvík verður opnuð að nýju mánudaginn 18. maí en líkt og aðrar sundlaugar landsins hefur hún verið lokuð frá 24. mars vegna COVID-19.

Sundlaugin verður opin 18. maí frá kl. 7:30 – 9:00 og aftur seinni partinn frá kl. 17:00 – 21:00. Frá og með 19. maí verður hefðbundinn opnunartími.

Samkvæmt tilmælum yfirvalda er í fyrstu aðeins heimilt að vera með helming þess gestafjölda sem sundlaugar geta venjulega tekið á móti. Þar af leiðandi getur komið til þess að takmarka þurfi aðgang og jafnvel loka tímabundið ef fjöldi gesta nær hámarki. Sú staða getur til dæmis komið upp að fólk þurfi að hinkra um stund ef margir eru í búningsklefa í einu.

Minnt er á að sóttvarnir eru ein mikilvægasta forvörnin gegn COVID-19 og eru sundlaugagestir beðnir að gæta að eigin öryggi og annarra, að sýna hvert öðru tillitssemi og virða tveggja metra bilið eins og mögulegt er.

Ljósmynd: Líf og fjör í sundlauginni, Árni Guðjón

The post Sundlaugin í Ólafsvík opnar á mánudag, 18. maí appeared first on Snæfellsbær.

Flokkar: Snæfellsbær

Snæfellsbær fjölgar sumarstarfsmönnum verulega

Snæfellsbær - Fim, 14/05/2020 - 12:00

Snæfellsbær fjölgar sumarstarfsmönnum verulega í ljósi atvinnuástandsins í samfélaginu í kjölfar Kórónaveirufaraldursins.  

Undanfarin ár hefur Snæfellsbær ráðið 16 – 20 ungmenni til að sinna ýmsum verkefnum sem falla til á sumrin, m.a. sem flokkstjóra í vinnuskóla og aðra sumarvinnu. Í ljósi atvinnuástands ungs fólk þetta árið var hins vegar ákveðið að Snæfellsbær myndi ráða hátt í 40 ungmenni til starfa. Stór hluti þeirra tekur að sér ný störf í sveitarfélaginu, ekki hefðbundin sumarafleysingarstörf.

Fyrstu sumarstarfsmennirnir hefja störf núna í maí og standa ráðningar fram í miðjan ágústmánuð. Hluti af þessum störfum falla undir atvinnuátak sveitarfélagsins í samvinnu við Vinnumálastofnum sem felur í sér að Vinnumálastofnun hefur samþykkt að greiða niður hluta launa tólf starfsmanna í tvo mánuði. Allir sumarstarfsmenn hjá Snæfellsbæ verða samt sem áður ráðnir til starfa í allt sumar eða þar til skólahald hefst.

The post Snæfellsbær fjölgar sumarstarfsmönnum verulega appeared first on Snæfellsbær.

Flokkar: Snæfellsbær

Vorhreinsun í Snæfellsbæ frá 14. maí til 2. júní

Snæfellsbær - Miðv.d., 13/05/2020 - 10:30

Vorhreinsun verður í Snæfellsbæ frá 14. maí til 2. júní

Tökum höndum saman og fegrum bæinn okkar. Flestum okkar líður betur í snyrtilegu umhverfi og nú er góður tími til að hreinsa nærumhverfið og eigin lóðir. 

Gámar fyrir garðúrgang ásamt gámum með mold verða settir upp á eftirtöldum stöðum:

Ólafsvík
við Grundarbraut 38 – 42

Rifi
á túni við Háarif 37

Hellissandi
við félagsheimilið Röst

Molta verður í boði hjá Terra umhverfisþjónustu. Úrgangi skal skilað á starfsstöð Terra sem er opin þriðjudaga og fimmtudaga milli 15:00 – 18:00 og laugardaga kl. 11:00 – 15:00.

Rusl úr görðum og nærumhverfi sem sett hefur verið í ruslapoka við lóðarmörk verður hirt af starfsmönnum áhaldahúss þriðjudaginn 2. júní. Ganga þarf vel frá úrganginum í lokaða poka og binda smærri trjágreinar saman í knippi. Poka með úrgangi og greinaknippi skal setja við lóðarmörk og ganga þannig frá að auðvelt sé að nálgast til að fjarlægja en jafnframt að umferð um gangstéttir teppist ekki.

The post Vorhreinsun í Snæfellsbæ frá 14. maí til 2. júní appeared first on Snæfellsbær.

Flokkar: Snæfellsbær

Kynning á verkefnum Markaðsstofu Vesturlands – fundur í Ólafsvík

Snæfellsbær - Þri, 12/05/2020 - 17:05

Markaðsstofa Vesturlands og Samtök sveitarfélaga á Vesturlandi héldu í dag kynningarfund á yfirstandandi verkefnum og viðbrögðum vegna núverandi stöðu í samfélaginu. Hægt er smella á hlekkinn neðst í fréttinni til að horfa á kynningarfundinn.

Starfsmenn markaðsstofunnar verða jafnframt á faraldsfæti um Vesturland á næstu dögum þar sem þeir ætla að kynna verkefni frekar fyrir ferðaþjónum og eiga samtal við hagsmunaaðila í landshlutanum.

Ferðaþjónustuaðilar í Snæfellsbæ eru hvattir til að mæta á fundaröðina sem hefst á morgun. Fundað verður í Ólafsvík á morgun kl. 13:00.

Miðvikudaginn 13. maí 2020 – Snæfellsnes

Kl. 10:00 – Breiðablik/Gestastofa Snæfellsness Kl. 13:00 – Sker í Ólafsvík Kl. 15:00 Kaffi 59 í Grundarfirði Kl. 17:00 Bókasafnið í Stykkishólmi   Fimmtudaginn 14. maí 2020 – Dalir og Borgarbyggð Kl. 13:00 – Dalakot í Búðardal Kl. 15:00 – Hraunsnef í Borgarfirði Kl. 17:00 – B59 Hótel í Borgarnesi   Föstudagurinn 15. maí 2020 – Akranes og Hvalfjörður Kl. 10:00 – Hótel Laxárbakki Kl. 13:00 Golfskálinn, Akranesi Kl. 16:00 Hverinn Kleppjárnsreykjum   Hér má horfa á kynningarfund Markaðsstofu Vesturlands.

The post Kynning á verkefnum Markaðsstofu Vesturlands – fundur í Ólafsvík appeared first on Snæfellsbær.

Flokkar: Snæfellsbær

Ársreikningur 2019 samþykktur samhljóða – góð fjárhagsstaða

Snæfellsbær - fös, 08/05/2020 - 17:22

Rekstur Snæfellsbæjar gekk vel á síðasta ári og skilaði 325 milljóna króna afgangi. Er það töluvert betri niðurstaða en sá 53 milljóna króna afgangur sem gert hafði verið ráð fyrir í fjárhagsáætlun, eða sem nemur 272 milljónum króna. Þetta kom fram á bæjarstjórnarfundi í gær þar sem ársreikningur Snæfellsbæjar var samþykktur samhljóða eftir síðari umræðu.

Rekstrartekjur sveitarfélagsins námu 2.652 milljónum króna á árinu, samkvæmt samanteknum rekstrarreikningi A og B hluta. Þar af námu rekstrartekjur A hluta 2.107 milljónum, en rekstrarniðurstaða A hlutans var jákvæð um 218 milljónir króna, en gert hafði verið ráð fyrir sex milljóna afgangi. Afkoma A hlutans var því 266 milljónum betri en áætlað hafði verið.

Eigið fé sveitarfélagsins í árslok nam 3.901 milljón króna samkvæmt efnahagsreikningi, en þar af nam eigið fé A hluta 2.959 milljónum.

Laun og launatengd gjöld Snæfellsbæjar námu 1.292,8 milljónum króna á árinu 2019, en starfsmannafjöldi sveitarfélagsins nam 145 stöðugildum í árslok. Veltufé frá rekstri var 381,4 milljónir á síðasta ári og veltufjárhlutvallið 0,76.  Handbært fé frá rekstri var 216,6 milljónir króna.

Heildareignir bæjarsjóðs námu 4.432,4 milljónum króna og heildareignir sveitarfélagsins í samanteknum ársreikningu námu 5.697,2 milljónum króna í árslok 2019. Heildarskuldir bæjarsjóðs námu 1.473,2 milljónum. Í samanteknum ársreikningi námu skuldir um 1.796,2 milljónum og lækkuðu um 145,4 milljónir milli ára.Eigið fé bæjarsjóðs nam 2.959,2 milljónum króna og eigið fé í samanteknum reikningsskilum nam 3.900,9 milljónum í árslok. Eiginfjárhlutfallið var 66,76% á árinu 2019 en var 63,43% árið áður. Snæfellsbær fjárfesti fyrir 457,1 milljón í varanlegum rekstrarfjármunum á síðasta ári. Engin ný lán voru tekin.

Hlutfall reglulegra tekna af heildarskuldum og skuldbindingum er 49,76% hjá sjóðum A hluta, en var 51,46% árið 2018. Hlutfallið var 46,33% í samanteknum ársreikningi en 51,63% árið 2018. Samkvæmt sveitarstjórnarlögum má hlutfallið ekki vera hærra en 150%. „Fjárhagsstaða Snæfellsbæjar verður því að teljast afar góð.“

The post Ársreikningur 2019 samþykktur samhljóða – góð fjárhagsstaða appeared first on Snæfellsbær.

Flokkar: Snæfellsbær

Tilboð opnuð í byggingu Þjóðgarðsmiðstöðvar á Hellissandi

Snæfellsbær - Þri, 05/05/2020 - 17:18

Í dag voru opnuð tilboð í byggingu Þjóðgarðsmiðstöðvar á Hellissandi. 

Verkið felst í uppbyggingu nýrrar þjónustumiðstöðvar í Þjóðgarðinum Snæfellsjökli á Hellissandi. Bygging gestastofunnar mun hýsa fjölbreytta starfsemi þjóðgarðsins. Húsgrunnur nýbyggingar samanstendur af tveimur megin byggingum er tengjast með miðrými. Húsið er á einni hæð staðsteypt og stálvirki að hluta, klætt með lerki.

Í fyrra var óskað eftir tilboðum í byggingu miðstöðvarinnar en reyndust tilboð töluvert hærri en kostnaðaráætlun gerði ráð fyrir. Í fyrra útboði var m.a. gert ráð fyrir að húsið yrði klætt með lerki og cortens stáli en nú er eingöngu gert ráð fyrir að það verði klætt með lerki.

Sex tilboð bárust í byggingarútboðið í ár og sjá má hér að neðan. Kostnaðaráætlun hljóðar upp á kr. 475.337.244.- 

Heildartilboðsverð með vsk:

  1. Húsheild ehf Tilboð hljóðar upp á kr. 420.695.939.-
  2. Þingvangur ehf Tilboð hljóðar upp á kr. 487.266.537.-
  3. Ístak ehf Tilboð hljóðar upp á kr. 487.752.434.-
  4. Viðskiptavit ehf Tilboð hljóðar upp á kr. 499.999.999.-
  5. Spennt ehf Tilboð hljóðar upp á kr. 525.734.155.-
  6. Framkvæmdafélagið Arnarhvoll Tilboð hljóðar upp á kr. 527.293.080.-

Tilboðin liggja nú á borði Framkvæmdasýslu Ríkisins sem óskaði eftir tilboðum í verkið fyrir hönd Umhverfis- og auðlindarráðuneytisins.

Ljósmynd: Sædís Rún Heiðarsdóttir aðstoðar Sigrúnu Magnúsdóttur, þáverandi umhverfisráðherra, að taka fyrstu skóflustunguna árið 2016.

The post Tilboð opnuð í byggingu Þjóðgarðsmiðstöðvar á Hellissandi appeared first on Snæfellsbær.

Flokkar: Snæfellsbær

Skimað fyrir COVID-19 í Snæfellsbæ 6. og 7. maí

Snæfellsbær - Þri, 05/05/2020 - 15:43

Íslensk erfðagreining í samstarfi við Heilsugæslustöðina í Ólafsvík býður íbúum Snæfellsbæjar upp á skimun fyrir Covid-19 dagana 6. – 7. maí næstkomandi. Sýnatakan mun fara fram í Félagsheimilinu Röst á Hellissandi og í sjúkraskýli við Heilsugæslustöðina í Ólafsvík frá kl. 13 – 16 á báðum stöðum.

Bókun fer fram með því að skrá sig á linkinn hér fyrir neðan og þá er valið á milli Ólafsvíkur og Hellissands:

https://bokun.rannsokn.is/

Athugið: Engar bókanir munu fara fram í gegnum síma.

Islandzka analiza genetyczna oferuje możliwość wykonania badań przesiewowych na Covid-19 które odbędą się w dniach 6 i 7 maja.

Pobieranie próbek odbędzie się w klinice zdrowia HVE w Ólafsvík  przy Engihlið 28 og Félagsheimilið Röst Hellissandur. W miejscu postoju karetek pogotowia , osoby które się zgłoszą muszą przebywać w samochodzie podczas pobierania próbek. Wykonany zostanie wymaz z nosa i gardła.

Rezerwacja odbywa się poprzez rejestrację tutaj:

https://bokun.rannsokn.is/

Uwaga należy zamawiać czas poprzez powyższą stronę. Nie ma możliwości umówienia terminów poprzez rejestrację telefoniczną.

The post Skimað fyrir COVID-19 í Snæfellsbæ 6. og 7. maí appeared first on Snæfellsbær.

Flokkar: Snæfellsbær

Ert þú í ferðaþjónustu?

Snæfellsbær - mánud., 04/05/2020 - 08:55

Í vor fer Ferðamálastofa í gang með nýtt hvatningarátak þar sem Íslendingar eru hvattir til að ferðast innanlands í ár og kaupa vörur og þjónustu.

Átakið verður keyrt á helstu miðlum með áherslu á net- og samfélagsmiðla og verður umferð beint inn á vefsíðuna ferdalag.is, þar sem hægt er að nálgast upplýsingar um fjölbreytta ferðaþjónustu um allt land.

Ferðaþjónustuaðilar eru hvattir til að fara yfir upplýsingar um fyrirtæki og þjónustu á vefsíðunni og senda póst á netfangið ferdalag@ferdamalastofa.is ef breyta þarf einhverju frá fyrri skráningu. Það er áríðandi að þetta verði gert sem fyrst þar sem átakið hefst í þessum mánuði.

Eins er mikilvægt er að ferðaþjónustufyrirtæki hér í Snæfellsbæ nýti næstu vikur til að huga að breyttum aðstæðum og aðlagi markaðsefni á íslensku.

Ef eitthvað er óljóst má hafa samband við markaðs- og upplýsingafulltrúa Snæfellsbæjar, heimir@snb.is.

Nánar má lesa um hvatningarátakið á vefsíðu Ferðamálastofu.

The post Ert þú í ferðaþjónustu? appeared first on Snæfellsbær.

Flokkar: Snæfellsbær

Fyrsta tilslökun – hvað breytist 4. maí?

Snæfellsbær - sun, 03/05/2020 - 14:17

Fyrsta tilslökun á samkomubanni vegna COVID-19 verður á morgun, mánudaginn 4. maí. Þá verður almenna reglan sú að 50 manns mega koma saman í stað 20 áður. Tveggja metra reglan verður áfram í gildi meðal fullorðinna og er mikil áhersla á sóttvarnir og hreinlæti.

Samkomubannið og sóttvarnaráðstafanir hafa eðlilega haft áhrif á starfsemi sveitarfélagsins undanfarnar vikur en með breyttum reglum sem taka gildi á morgun verður hægt að aflétta ákveðnum takmörkunum. Smám saman færist þjónusta bæjarins því til fyrra horfs.

Dvalar- og hjúkrunarheimilið Jaðar

Heimsóknir verða leyfðar inn á heimilið með ákveðnum takmörkunum frá og með 4. maí. Nauðsynlegt verður að takmarka fjölda gesta hverju sinni og sýna þarf ítrustu varkárni og virða sóttvarnaráðstafanir í heimsóknum. Nánar í þessari tilkynningu frá Jaðri.

Leikskóli

Skólastarf fer aftur í eðlilegt horf og börn geta mætt alla daga. Áfram verður þó unnið eftir tilmælum sóttvarnarlæknis og almannavarna og hvatt til sérstaks hreinlætis. Opið hús í lok maí, sem haldið er árlega, verður ekki haldið í ár.

Grunnskóli

Mánudaginn 4. maí hefst skólastarf samkvæmt stundaskrá. Sundkennsla og kennsla í list- og verkgreinum hefjast að nýju, reglur í skólabíl fara í fyrra horf, Skólabær og mötuneytið opna á ný.

Tónlistarskóli

Kennsla í tónlistarskóla verður með óbreyttu sniði en skv. tilmælum frá yfirvöldum verða árlegir vortónleikar ekki haldnir í ár.

Íþróttamannvirki

Íþróttahúsið í Ólafsvík opnar aftur fyrir starfsemi grunnskóla og íþróttastarfsemi barna í leik- og grunnskólum. Æfingar yngri flokka hjá UMF Víking/Reyni hefjast að óbreyttu. Sundlaugin í Ólafsvík verður áfram lokuð.

Skólabíll

Akstur skólabíls hefst aftur skv. áætlun næstkomandi mánudag.

Ærslabelgir

Lofti verður hleypt í ærslabelgina í Ólafsvík og á Hellissandi þann 4. maí. Skv. tilmælum frá almannavörnum verða þeir eingöngu fyrir 16 ára og yngri.

Bókasafn

Bókasafn opnar á mánudaginn og verður opið þrjá daga í viku; mánudag, miðvikudag og fimmtudag. Almennan opnunartíma má nálgast hér.

Félagsstarf eldri borgara í Klifi

Félagsstarf eldri borgara í Klifi á miðvikudögum hefst ekki aftur að svo stöddu.

Tjaldsvæði

Beðið er leiðbeininga varðandi útfærslu á starfsemi tjaldsvæði frá almannavörnum en stefnt er að því að opna tjaldsvæðið í Ólafsvík á næstunni. Vegna framkvæmda á tjaldsvæðinu á Hellissandi opnar það ekki alveg strax.

The post Fyrsta tilslökun – hvað breytist 4. maí? appeared first on Snæfellsbær.

Flokkar: Snæfellsbær

Ljósmyndasamkeppni Snæfellsbæjar 2020

Snæfellsbær - Fim, 30/04/2020 - 13:40

Í tilefni sumars og hækkandi sólar efnir Snæfellsbær til ljósmyndasamkeppni í fyrsta sinn.

Menningarnefnd Snæfellsbæjar heldur utan um verkefnið ásamt markaðs- og upplýsingafulltrúa og hefur verið ákveðið að þemað í fyrstu samkeppninni verði einfalt; Sumar í Snæfellsbæ.

Þemað er vítt skilgreint og tækifæri fyrir áhugafólk um ljósmyndun til að láta ljós sitt skína. Lifandi mannlíf eða blómstrandi náttúra, Snæfellsjökull í allri sinni dýrð, listrænar myndatökur, landslagsmyndir eða sólsetur við Breiðafjörðinn. Það er allt opið og bundið skilgreiningu ljósmyndara á því hvað sé sumarlegt.

Mögulegt er að senda inn myndir frá 1. maí til og með 31. júlí nk. Vegleg verðlaun verða veitt fyrir þrjár bestu myndirnar. Ath. það þarf ekki að taka nýjar myndir heldur má senda myndir úr safni einstaklinga.

Að keppni lokinni verða allar myndir til sýnis á vefsíðu Snæfellsbæjar og með þátttöku í ljósmyndasamkeppninni veita þátttakendur leyfi til þess að myndirnar verði notaðar sem kynningarefni fyrir Snæfellsbæ.

Snæfellsbær hvetur íbúa og aðra sem leið eiga um sveitarfélagið til að taka þátt, deila myndum sem víðast á samfélagsmiðlum og senda á neðangreint netfang til Snæfellsbæjar.

Það geta allir tekið þátt!

Reglur:

  • Þema keppninnar er Sumar í Snæfellsbæ.
  • Mynd verður að vera tekin innan sveitarfélagsmarka Snæfellsbæjar.
  • Ekki er heimilt að senda inn myndir sem bundar eru höfundarrétti annars en þátttakanda.
  • Hver þátttakandi má senda inn að hámarki fimm myndir.
  • Senda myndir á ljosmyndasamkeppni@snb.is
  • Skilafrestur er til miðnættis 31. júlí 2020.

The post Ljósmyndasamkeppni Snæfellsbæjar 2020 appeared first on Snæfellsbær.

Flokkar: Snæfellsbær

Mánudaginn 4. maí hefst skólastarf samkvæmt stundaskrá

Grunnskóli Snæfellsbæjar - Fim, 30/04/2020 - 13:26
Mánudaginn 4. maí hefst skólastarf samkvæmt stundaskrá. Sundkennsla og kennsla í list- og verkgreinum hefjast að nýju, reglur í skólabíl fara í fyrra horf, Skólabær og mötuneytið opna á ný.Nokkrir punktar sem við þurfum að gæta vel að Halda fullorðnum innan við 50 í hverju rými, starfsfólki og gestum. Það séu 2 m á milli fullorðna Engar fjöldatakmarkanir gilda um nemendur Aðgengi að skólanum er takmarkað, gestir velkomnir en þeir láti vita af komu sinni og panti tíma.Sjá nánar - https://sites.google.com/gsnbskoli.is/03042020/fr%C3%A9ttaskot-8
Flokkar: Snæfellsbær

Síður

Subscribe to Ólafsvíkur- og Ingjaldshólsprestakall aggregator - Snæfellsbær